رسالة من عسكري مسرح الى وزير الاشغال … يا ليتَني متُّ ولا عشت بسوريا وانذليت
دمشق..
وصل الى بريد موقع A2Zsyria رسالة من عسكري احتياط دورة 102 مسرح وخادم جيش اكتر من 8 سنين واتحفظ على ذكر اسمه وأنقلها حرفيا يقول فيها : انا عم بحكي بأسم رفقاتي اللي متلي واللي خادمين جيش ونحن بعد ما اتسرحنا طلعنا ايد من قدام وايد من ورا .. لا تعويض متل الخلق ( 600 الف ليره فقط لا غير ) ولا شغل .. عطونا بعد سنه من تسريحنا راتب 35 الف وهلق خلصت ومافيه تمديد وبقينا بلا راتب ..
واضاف العسكري .. صرلي سنتين عم حاول انا ورفقاتي نلاقي شغل يناسبنا ولهلق امورنا تعيسه .. عم نشتغل بالحراسات وكراسين بالمطاعم وبالعتاله وبشغلات مرهقه جسدياً وفيه منا ماعم يشتغل ابدا .. انتسبنا لمراكز التدريب المهني عأساس يوظفونا بعد ما ناخد الشهادات .. طبعا مافيه حل تاني قمنا داومنا والتزمنا وقسمونا قسمين قسم داوم ب1 تشرين الاول واتخرج بعد 4 شهور واتوظفوا بعد 4 شهور كمان من تخرجهن ونحن الدفعة التانيه التزمنا شهرين وبعدا أجت جائحة كورونا ولوقت ما فك الحظر ونحن ناطرين ايمتي نكمل وإلا بخبرونا انو التغت الدوره
وتابع العسكري قبل ما اعرف انو الدوره التغت إجاني عرض عبنك موظف كونترول راتب 100 الف بس ضليت متردد وما كنت قدم وراقي طمعت بشهادة الكهربا انو لاحق عأي وظيفة بس شهادة معهد الكهربا مو كل يوم رح تصرلي وبعدا عرفت انو وزير الاسكان لغاها وبعت كتاب انو نلتحق بالدوره الجديده 9 شهور كامله بال2021 ..
واضاف العسكري جمعت رفقاتي ورحنا عالوزاره وللصدفه كان يوم الاثنين وبهذا اليوم عأساس الوزير بقابل المواطنين ولهلق ما شفناه صرلنا 3 اسابيع منروح ونجي .. قابلنا معاون الوزير بالزور اسمو الاستاذ مازن اللحام .. اهتم فينا وحاول بموضوعنا بس بالاخير اتغير معنا وما بقى اهتم وقلنا بآخر مقابله معو انو ما مشي الحال .. هي الطلب رح ابعتو اللي قدمناه اول مره واخترنا من بعضنا 6 ليمشوا بالموضوع نيابه عن الكل وحتى عن باقي المحافظات لأنو اكيد مو قادرين يجو .. طبعاً صارت مقابلات عمدى 3 اسابيع مع معاونين الوزير وكانت مقابلات فاشله بعد ما وعدونا خير .. يوم يقلولنا مشي الحال وبعد كم يوم يقلولنا الوزير ما غير رأيو .. بعدين نرجع نطلع ونقابل معاون الوزير من اول وجديد ويرجع يقلولنا خلص مشي الحال ويرجعوا بعد كم يوم انو للأسف ما قدرنا .. قضيناها 3 اسابيع هيك رايحين جايين .. ملو صحاب الشغل منا من كتر ما طلبنا اذونات وما استفدنا شي !
وقال العسكري المسرح كانت محاوله اخيره اخدت رفيقي واطلعنا عالوزاره .. شفنا المعاون وكان استقبالو بارد وما استغرق دقيقتين .. ما يأست طلعت ورحت لعند مدير مكتب الوزير وسجلت اسمي مقابله معو شخصياً .. وطلعنا .. بعد ساعه دقولي انو بدن ياك .. طلعت وشفت معاونة الوزير راما ضاهر استقبلتني بطريقه اظبط من مقابلة رفقاتي بالمره الماضيه وضليت اشرحلا ونتناقش لحتى عطتني خيار انو بتبلشو معنا بالسنه الجديده وما بضلو 9 شهور بضلوا نص المده يعني تقريبا اربع شهور وحتى مو اكيد تركتا على اثرا وطلعت لا بعرف حالي رضيان ولا مو رضيان !
وبرجع بقول يا ليتَني متُّ قبل هذا وكنت نسياً منسيا ولا عشت بسوريا وانذليت هالذل بعد كل هالتعب والاستحقار بحقوقنا ونحن اللي وقف البلد ونجي من هالازمه بدمنا وعرقنا.
A2Zsyria